أهلًا بيك: كلود وكلود كود والـSkills

كلود يقدر يساعدك في إيه؟

• الشرح والتبسيط: يشرح لك موضوع صعب بكلام سهل وأمثلة تناسبك.
• الكتابة والمراجعة: يساعدك تكتب مقال أو إيميل أو منشور، وتراجع الصياغة وتحسّنها.
• التلخيص: يلخّص لك نص طويل ويطلع منه الأفكار الأساسية.
• ترتيب الأفكار: يساعدك تحوّل أفكار متفرّقة لخطة أو خطوات واضحة.
• تحليل المعلومات: يساعدك تفهم معلومات وتقارن بينها وتطلع منها بملاحظات.
• البرمجة: يكتب كود، ويشرحه، ويساعدك تكتشف الأخطاء وتصلّحها.

مثلًا، لو عندك كافيه زي كافيه المرسى في بورسعيد، ممكن تقول له:

«دي معلومات الكافيه والمنتجات اللي بنقدمها. ساعدني أكتب تعريف بسيط يفهمه الزبون، من غير ما تضيف معلومات من عندك.»

كل ما توضّح المطلوب وتديله المعلومات اللي محتاجها، يبقى عنده أساس أفضل يساعدك عليه. وكلود ممكن يغلط أو يفهمك بشكل مختلف عن قصدك، علشان كده راجع النتيجة وتأكد من المعلومات قبل ما تعتمد عليها.

فكّر فيها: لو عندك فكرة لمشروع، إيه المعلومات اللي محتاج تجهّزها عشان تشرحها لكلود بوضوح؟

إيه الفرق بين كلود وكلود كود؟

لما تستخدم كلود في المحادثة، بتكتب له طلب، وهو يرد عليك بشرح أو نص أو اقتراح. ممكن مثلًا تطلب منه يشرح لك إزاي تعمل صفحة ويب أو يكتب لك الكود بتاعها.

أما كلود كود (Claude Code)، فهو أداة مخصّصة للشغل على المشاريع البرمجية. يقدر يقرا ملفات المشروع، وينشئ ملفات جديدة، ويعدّل الملفات الموجودة، ويشغّل أوامر تساعده ينفّذ المهمة ويتحقق منها، حسب الصلاحيات اللي إنت بتديهاله.

يعني لو طلبت منه يعمل صفحة، يقدر يشتغل على ملفاتها جوه فولدر المشروع. وبعدها تقدر تطلب منه يعدّل الألوان، أو يكبّر الكتابة، أو يصلّح مشكلة في شكل الصفحة على الموبايل.

إنت بتشرح المطلوب وبتراجع النتيجة، وكلود كود بيساعدك في التنفيذ. وقبل ما توافق على خطوة بيطلب إذنك فيها، فاقرا هو ناوي يعمل إيه.

لخبطة شائعة: المحادثة مع كلود بتساعدك تفهم وتكتب وتفكّر. كلود كود كمان يقدر يشتغل على ملفات المشروع حسب الصلاحيات اللي إنت بتديهاله.

إيه هو Plan mode؟

Plan mode أو وضع التخطيط بيخلّيك تطلب من كلود يفكّر في خطوات الشغل ويعرض لك خطة تراجعها قبل التنفيذ. وبكده تلاقي أي سوء فهم بدري، قبل ما أي ملف يتغيّر، وتوافق على خطة إنت فاهمها. هتجرّبه بالتفصيل في درس لاحق.

خلّي بالك: راجع اقتراحات كلود وتأكد إنك فاهم التغيير المطلوب قبل ما توافق عليه. الصلاحيات بتختلف حسب وضع التشغيل اللي إنت مختاره.

إزاي ممكن تستخدم كلود؟

في أكتر من طريقة تستخدم بيها كلود، حسب طبيعة شغلك والمكان اللي بترتاح تشتغل فيه.

من الموقع الرسمي على المتصفح

تقدر تفتح الموقع الرسمي لكلود من متصفح زي Google Chrome، وتسجّل دخولك وتبدأ محادثة وتكتب طلبك.

المتصفح هو البرنامج اللي بتفتح بيه المواقع على الإنترنت. Google Chrome مثال عليه، وزيه Safari وMicrosoft Edge. في الطريقة دي بتستخدم كلود من الموقع، من غير ما تثبّت تطبيق كلود على جهازك.

من تطبيق Claude Desktop

Claude Desktop هو تطبيق كلود اللي بتثبّته على الكمبيوتر، وتفتحه زي أي برنامج عندك. تقدر تنزّله للماك أو لويندوز من صفحة التحميل الرسمية.

تقدر تستخدمه للمحادثة مع كلود، وكمان فيه جزء مخصّص للشغل باستخدام كلود كود. يعني تطبيق الكمبيوتر بيجمع لك طرق الشغل مع كلود في واجهة واحدة، والخصائص المتاحة بتعتمد على حسابك وخطتك.

في الدليل ده هتستخدم Claude Desktop، وتحديدًا قسم Code لما تبدأ تشتغل على المشروع. هتعرف إزاي تجهّزه في الدرس الجاي.

طرق تانية لاستخدام كلود كود

ممكن تستخدم كلود كود من نافذة الأوامر، وهي مكان بتكتب فيه تعليمات للجهاز لتشغيل البرامج أو التعامل مع الملفات. على الماك اسم التطبيق Terminal، وعلى ويندوز ممكن تستخدم PowerShell من نافذته أو جوه تطبيق Windows Terminal.

وممكن تستخدمه جوه Visual Studio Code (VS Code) أو Cursor؛ ودي برامج بتساعدك تفتح ملفات المشروع وتعدّلها. Cursor فيه كمان أدوات ذكاء اصطناعي مدمجة. تقدر تضيف كلود كود للبرنامج عن طريق Extension، وهي إضافة بتثبّتها عشان تضيف له وظيفة جديدة.

مش محتاج تستخدم الطرق دي عشان تكمّل الدليل؛ هتشتغل من قسم Code في Claude Desktop.

جرّب بنفسك: وصف منتجات كافيه المرسى

هتجرّب دلوقتي كلود في المحادثة على المتصفح، من غير ما تثبّت حاجة. هتديله ملف فيه منتجات الكافيه، وتطلب منه يكتب وصف لكل منتج. الوصف ده هتحتاجه بعد كده لما نبني صفحة للكافيه.

محتاج: حساب مجاني على claude.ai، وملف حقائق كافيه المرسى (Sample business facts file).

الخطوة ١: نزّل ملف الحقائق

نزّل ملف حقائق كافيه المرسى. فيه منتجات الكافيه وأسعارها، وبعض المنتجات مكوّناتها مش مذكورة، ودي مقصودة.

المصادر: ملف حقائق كافيه المرسى (PDF)

الخطوة ٢: ارفع الملف في محادثة جديدة

افتح claude.ai، وابدأ محادثة جديدة، وارفع الملف اللي نزّلته في مربع الكتابة.

ارفع ملف الحقائق ده بس. متحطش بيانات حقيقية لزباين أو حاجة خاصة بيك.

الخطوة ٣: ابعت أول طلب

انسخ الطلب ده والصقه في المحادثة:

أنا صاحب كافيه المرسى في بورسعيد، وبجهّز صفحة تعرّف الزباين بمنتجاتنا.
اكتب لكل منتج في الملف المرفق وصف من جملتين.
استخدم المعلومات اللي في الملف بس. لو مكوّنات منتج مش مذكورة، اكتب "المكوّنات مش مذكورة" ومتخمّنش. خلّي الأسلوب بسيط وودود، واكتب اسم المنتج بخط عريض وتحته الوصف.

اقرا الرد. لاحظ إزاي كلود تعامل مع المنتجات اللي مكوّناتها مش مذكورة.

فكرة مهمة: الطلب الكويس فيه ثلاث حاجات:
١. تشرح السياق: مين إنت وليه محتاج ده («أنا صاحب كافيه… وبجهّز صفحة»).
٢. تحدّد المطلوب: إيه اللي كلود يعمله («اكتب لكل منتج وصف من جملتين»).
٣. تحط القواعد: الأسلوب والشكل واللي ميعملوش («استخدم الملف بس، ومتخمّنش لو مكوّنات منتج مش مذكورة، وخلّي الأسلوب ودود»).
اتكلم مع كلود زي ما بتكلّم زميل في الشغل: بشكل طبيعي ومختصر.

الخطوة ٤: عدّل بطلب تاني

مش لازم تبدأ من الأول. كمّل في نفس المحادثة:

اختصر كل وصف لجملة واحدة، وضيف سعر المنتج بعد اسمه.

الخطوة ٥: خلّي كلود يراجع نفسه

راجع الأوصاف اللي كتبتها مقابل الملف، وقولّي لو في أي معلومة مش موجودة فيه.

وبعدين راجع الرد بنفسك. كلود بيساعد في المراجعة، لكن إنت اللي بتقرر.

احتفظ بالنتيجة

انسخ الأوصاف اللي رضيت عنها في ملف نصي. هنستخدمها في درس لاحق.

خلّي بالك: كلود ممكن يضيف معلومة مش في الملف. قارن كل وصف بالملف قبل ما تستخدمه، وشيل أي معلومة مش موجودة فيه.

إيه هي Claude Skills وإزاي بتساعدك؟

الـSkill هي مجموعة تعليمات منظّمة بتوجّه كلود وهو بيشتغل على مهمة معيّنة. ممكن كمان تضم ملفات مرجعية أو أدوات تساعده ينفّذ المهمة. فكّر فيها كأنها دليل شغل بيشرح له خطوات أو قواعد يتبعها لما تحتاج نوعًا معيّنًا من المساعدة.

مثلًا، ممكن تستخدم Skill تساعدك تفكّر في المشروع وترتّب متطلباته قبل التنفيذ، أو واحدة توجّه كلود وهو بيصمّم واجهة الموقع. وفي كل الأحوال، راجع النتيجة وتأكد إنها مناسبة لاحتياجاتك.

من الأمثلة اللي هتقابلها:

واجهة المستخدم (UI) هي الحاجات اللي الشخص بيشوفها وبيتفاعل معاها، زي الأزرار والقوائم والألوان. أما تجربة المستخدم (UX) فهي مدى سهولة ووضوح استخدام الموقع أو التطبيق بالنسبة للشخص.

فكرة مهمة: الـSkill بتوجّه طريقة الشغل، لكن إنت لسه اللي بتراجع النتيجة وبتقرر إذا كانت مناسبة لمشروعك.

هل كلود لوحده يقدر يساعدك تبني مشروع؟

كلود يقدر يساعدك تعمل مشروع صغير وبسيط، زي صفحة هبوط أو صفحة تعرّف الناس بيك وبالخدمات اللي بتقدمها. ممكن تطلب منه ينشئ الصفحة ويعدّل شكلها ومحتواها، وتشوف النتيجة على جهازك.

لكن حسب احتياجات المشروع، ممكن تحتاج أدوات وخدمات إضافية. مثلًا، لو عايز الناس تفتح الصفحة على الإنترنت، هتحتاج مكان تنشرها عليه. ولو عايز تستقبل رسائل من الزوار وتحفظها، هتحتاج مكان مناسب لحفظ البيانات.

وكمان لو المشروع هيكبر وهتحدّثه مع الوقت، أدوات حفظ نسخ الشغل ومتابعة التغييرات هتساعدك تنظّمه وترجع لنسخة سابقة لو احتجت. وفي مشاريع تانية ممكن تحتاج خدمات زي تسجيل دخول المستخدمين أو إرسال الإيميلات.

كلود يقدر يساعدك تجهّز المشروع وتربطه بالأدوات دي، لكن كل أداة ليها دورها. خلّينا نتعرّف على أمثلة للأدوات دي.

الأدوات اللي بتساعدك تبني المشروع وتنشره

الأدوات الأساسية

أدوات بتختارها حسب المشروع

الأدوات دي لكل واحدة منها وظيفة مختلفة، وبتختار اللي تحتاجه منها حسب المشروع والخدمات اللي عايز توفّرها فيه.

تكون خلّصت لما…

• تقدر تشرح بكلامك كلود بيساعد في إيه، وإمتى تحتاج تراجع إجابته.
• تقدر توضّح الفرق بين المحادثة مع كلود والشغل باستخدام كلود كود.
• تقدر توضّح يعني إيه Plan mode وليه بتراجع الخطة قبل التنفيذ.
• تقدر تشرح ببساطة يعني إيه Skill، وتذكر مثالًا لأداة ممكن يحتاجها المشروع.

اختبر نفسك

اختار إجابة واحدة لكل سؤال. تقدر تغيّر إجابتك وتحاول تاني؛ الأسئلة من غير درجات.

المراجع

تعريف كلود وإمكانياته، استخدامات كلود كود، طرق بدء استخدام كلود، كلود كود في تطبيق الكمبيوتر، استخدام كلود كود داخل VS Code وCursor.